Hoxe venres a palabra do día destacada no Portal das palabras é… «ramal«. Xa sabedes, premede na ligazón a esa páxina e poderedes saber máis sobre o termo. A imaxes ten dereitos de copia. Feliz venres ou sexta feira!
Concursos e certames
A Secretaría Xeral da Lingua e a Dirección Xeral de Xuventude teñen aberto, ata o 17 de marzo, o prazo para participar no certame de declaracións de amor, Lingua de Namorar. Esta iniciativa, que busca dinamizar o galego entre a mocidade, nas súas relacións persoais e en Internet, establece tres categorías, unha delas exclusiva para Instagram. Podedes consultar as bases en: https://www.lingua.gal/a-secretaria-xeral/convocatorias/_/Premios/convocatoria_0202/lingua-namorar-2025.
Ademais, podemos destacar o Concurso de Marcapáxinas das Letras Galegas organizado polo EDLG do IES San Clemente, ao que se pode presentar o alumnado de ESO, bacharelato e FP de todos os institutos.
Animádevos a participar!
Experiencia 3º ESO «Hoxe falei galego e…»
O pasado 3 de febreiro o alumnado de 3º de ESO participou no reto «Hoxe falei galego e…» no que durante toda a xornada lectiva deben empregar este idioma en todos os ámbitos, coa colaboración do profesorado de todas as materias que se imparten ese día. Aproveitamos para agradecerlles a axuda prestada, xa que esta facilitou que o reto chegase a bo porto.
Adxuntamos algunha mostra de alumnos que quixeron compartir a súa experiencia»
Profesorado de 3º de ESO.
Premios. Información dende o Servizo Xeral de Política Lingüística
Envíanno dende o SXL a seguinte información sobre premios:
«O IES Castelao de Vigo organiza, no marco das conmemoracións deste ano dedicado ao ilustre rianxeiro, o concurso literario-artístico As Cousas do Castelao. Poderán participar alumnas e alumnos de calquera centro de Galicia e tamén persoas adultas. As obras, que terán que ser inéditas e constar de texto e ilustración ao xeito das Cousas, deberán remitirse ao correo: cousasdocastelao@gmail.com, ata o 30 de marzo.
Ademais, a Real Academia Galega e a Asociación PuntoGal convocan o VIII Concurso de microrrelatos, no que se premiarán as nove mellores composicións que se presenten nas tres categorías: infantil, xuvenil e maiores de idade. Podedes enviar os traballos ata o 28 de febreiro. Todos os detalles da convocatoria están en: https://relatos.gal/».
Animámosvos a participar.
Un saúdo cordial,
Inscrición no proxecto » O galego nas aulas» de Radio Líder
Comunicámosvos que O Liceo La Paz está inscrito na iniciativa de Radio Líder O galego nas aulas. En palabras dos encargados do proxecto da emisora trátase «dunha proposta innovadora e multimedia dirixida a fomentar o uso da lingua galega entre o alumnado de 1º e 2º da ESO. A iniciativa levará a radio aos centros educativos, ofrecendo un espazo de expresión que permitirá potenciar o uso do galego entre os máis novos».
Asi tamén nos indican na información que nos fixeron chegar que entre febreiro e xuño, Radio Líder trasladará os seus estudos móbiles a seis centros educativos seleccionados para participar neste proxecto. O alumnado destes centros será o protagonista dun programa de radio con distintas seccións e contidos, e emitido en directo desde as instalacións escolares, difundido por toda a rede de emisoras de Radio Líder en Galicia, así como a través da web, App, YouTube e Redes Sociais»
.
Durante as dúas horas de duración do programa, a rapazada participará en dinámicas que promoverán o uso da lingua galega. Ademais, entrevistarán a unha personalidade destacada do ámbito cultural, deportivo, social ou político do seu concello, fomentando o interese polo seu contorno e pola lingua galega.
O prazo de inscrición finaliza o 24 de xaneiro. A partir de aí a emisora fará un sorteo e escollerá 6 centros escolares da totalidade dos inscritos. O resultado do sorteo comunicarase o 27 de xaneiro.
Esperamos que a fortuna nos acompañe.